ТӨРИЙН ОРДОНД 1000 ХҮН АЖИЛЛАДАГ
Монгол улсын төрийн ордон 35804 м.кв талбайтай, нийт давхаруудын багтаамж 134,299,69 м.куб. Ордонд ажиллагч нэг хүнд дунджаар 4144 м.кв талбай оногддог, албан ажлын өрөөнүүд 13075,7 м.кв, танхимууд 2195 м.кв. Төрийн ордон 491 ажлын өрөө тасалгаатай, 536 хаалга 932 цонхтой, дээврийн хөвөө хэмжээ 509,6 м.кв бөгөөд сантехникийн шугам сүлжээний нийт урт нь 30 км шахам юм.
Тус ордоны ажлын өрөө танхимуудыг ээлж тогтоон засварладаг. Ийм байдлаар нэг өрөө 6-7 жилийн дараа засварт ордог байна. Төрийн ордонд Их Хурлын нэгдсэн хуралдааны, олонх, цөөнхийн бүлгийн хуралдааны, Засгийн газрын хуралдааны, Үндсэн хуулийн цэцийн, ердийн хуралдааны, ёслол хүндэтгэлийн, хүлээн авалтын, уулзалтын гээд арав гаруй том танхим бий.
Хамгийн том нь Их танхим 1200 хүний суудалтай. Тэрчлэн ордонд 100 хүний суудалтай зоогийн газар болон номын сан, уншлагын газар, хэвлэх үйлдвэр, спорт чийрэгжүүлэлтийн танхим, худалдааны цэгүүд, угаалга, хими цэвэрлэгээ, оёдолчин, үсчин, цайны газар, цэцгийн хүлэмж, эмийн сан, банкны тооцооны төв, холбооны салбар зэрэг үйлчилгээний зориулалттай 40 өрөө тасалгаа бий.
Төрийн ордонд Монгол улсын Ерөнхийлөгч, түүний Тамгын газар, Улсын Их Хурал, түүний Тамгын газар, Үндсэн хуулийн цэц, Ерөнхий сайд, Засгийн газрын хэрэг эрхлэх газар, тэрчлэн Төр засгийн үйлчилгээ аж ахуйг хариуцсан газрын төв аппарат, төрийн ёслол үйлчилгээ, харуул хамгаалалтын албаныхан байрлаж үйл ажиллагаагаа явуулдаг.
Засгийн газрын гишүүд нь төрийн ордонд тус тусын яамдын өрөөтэй. Төрийн ордонд нийтдээ 1000 шахам хүн ажилладаг.
ТӨРИЙН ОРДОН ДАХЬ УРЛАГИЙН БҮТЭЭЛҮҮД
Монгол төрийн энэ ордонд Монгол хүний ур ухаанаар бий болсон урлагийн ховор нандин бүтээл цөөнгүй бий. Одоо төрийн ордонд ахмад болон залуу уран бүтээлчдийн 100 шахам зураг, 10 гаруй уран баримал, сийлбэр, туурган хивс, торго арьсан урлалын бүтээлүүд ордныг чимэглэж байдаг.
Эдгээрийн дотор эзэн Чингис хааны гантиг чулуун цээж баримал, есөн хөлт цагаан тугны орчны 87 ам.метр талбай тойрсон чимэглэл, Хүннүгийн үеийн хээ бүхий ширмэл ширдэг, ардын зураач Н.Чүлтэмийн "Талын Айл", О. Цэвэгжавын "Гүүн зэл дээр", М.Цэмбэлдоржийн "Отгонтэнгэр", Б.Гомбосүрэн, Д.Цэрэнпил нарын бүтээсэн "Эх орон" сэдэвт 20 метр туурган хивс, залуу уран бүтээлч Н.Лхагвасүрэнгийн "Төрийн долоон эрдэнэ" түүх уламжлалын сэдэвт 17 метр урт Монгол зураг зэрэг гайхамшигт бүтээдүүд олон бий. УИХ-ын хуралдааны танхим дахь УИХ-ын дарга, Ерөнхийлөгч, Ерөнхий сайдын үндэсний уран гоё сийлбэртэй сэнтий /суудал/, мөн төр засгийн тэргүүн нарт гадаадын дээд зиндааны байгууллага, хүмүүсээс бэлэглэсэн зүйлийн 70 гаруй үзмэр бүхий үзэсгэлэн байдаг.
Бас төрийн ордны дундах чөлөөнд эзэн Чингисийн суумал хөшөө бүхий төрийн хүндэтгэлийн 10 ханатай өргөө гэр бий.
Төрийн ордны хонгилуудыг үндэсний хээ хуартай гоёмсог сайн чанарын хивсээр бүрсэн бөгөөд түүнд С.Бавуусүрэн /төр засгийн үйлчилгээ аж ахуйг эрхлэх газрын орлогч дарга асан/ их үүрэг гүйцэтгэжээ. Ордонд буй ховор нандин бүтээлүүдийн дотроос Д.Баяндалайн санаачилгаар нэрт зураач Н.Лхагвасүрэнгийн удирдлагаар бүтээсэн "Төрийн долоон эрдэнэ" хэмээх 17,5 метр урт, 1,5 метр өндөр, 108 үйл явдал бүхий 999 хүн, 64 бөх, 551 айл, 13 гэр, 9 нохой зэргийг Монгол зургийн аргаар урласан хосгүй нандин бүтээл тавигдсаныг цохон тэмдэглэлтэй.
Зураач Н. Лхагвасүрэн уул зургийг дүрслэл, арга барилын хувьд уламжлалт Монгол зургийн аргаар зотон даавуун дээр өндөр чанартай будгаар / арилдаггүй / орчин үеийн Монголын дүрслэх урлагийн түүхэнд байгаагүй хэмжээгээр бүтээжээ. Энэ зурагт дүрсэлсэн Хан төрийн долоон эрдэнэ нь нэн эрт цагт Жагарын орны Загарвардын хаан эдэлж байсан эрдэнийн зүйл гэж үздэг юм байна.
1911 онд Манжийн ноёрхлыг түлхэн унагасны дараа Богд гэгээнийг төрийн тэргүүнээр өргөмжлөөд эл долоон эрдэнийг цогцоор нь бүтээж байсан түүхтэй ажээ. Хан төрийн долоон эрдэнэд: Хүрд эрдэнэ, Чандмань эрдэнэ, Хатан эрдэнэ, Түшмэл эрдэнэ, Заан эрдэнэ, Морин эрдэнэ, Баатар эрдэнэ багтах бөгөөд Түшмэл эрдэнэ нь аль ч талаасаа тоолсон 4 дэх эрдэнэ буюу голын эрдэнэ учир тэгш хэмийн зохиомжинд Монгол зургийн арганд маш сайн нийцсэн ажгуу.
УЛС ТӨРИЙН СОНИН -ны 2007 оны арваннэгдүгээр сарын дугаараас иш татав